नेपाल अखबार, एजेन्सि। कोरोना भाइरस संक्रमित देखिन थालेपछि चीनका केही स्थानमा फेरि लकडाउन लागू गरिएको छ।
लामो समययता चीनमा नयाँ कोरोना संक्रमित देखिएका थिएनन् भने त्यहाँ मृत्युदर शुन्य छ।
हाल बेइजिङको फेङताइ जिल्लाको ११ वटा आवासीय क्षेत्रमा लकडाउन गरिएको छ। दक्षिणी बेइजिङको सिनफादी मासु बजारमा कार्यरत व्यक्तिमा कोरोना संक्रमण देखिएपछि स्थानीय संक्रमणको खतरा बढेको भन्दै लकडाउन गरिएको हो।
बेइजिङमा ५० दिनपछि स्थानीयबाट स्थानीयमा कोरोना संक्रमण भएको देखिएको हो।
कोरोनाको उद्गमस्थल चीनमा हालसम्म ८३ हजार ७५ मा कोरोना पुष्टि भएको छ। त्यहाँ ४ हजार ६३४ को मृत्यु भइसक्दा ७८ हजार ३६७ उपचारपछि स्वस्थ बनेका छन्।
#BREAKING Parts of Beijing locked down due to fresh virus cluster
चीन कोरोना प्रभावित राष्ट्रको १८ औं स्थानमा छ। अमेरिका, ब्राजिल, रुस, भारत हाल कोरोनाबाट निकै प्रभावित छन्।
कोरोनाको दोस्रो लहरको खतरा आउने विज्ञहरुले चेतावनी दिइरहेको समयमा चीनका नयाँ संक्रमितहरु देखिएका हुन्।
हालै विश्व स्वास्थ्य संगठन डब्लूएचओले विश्वका केही देशमा कोरोना महामारीको दोस्रो लहर देखापर्न थालेको बताएको छ।
सुरुमा लकडाउन, सामाजिक दूरीलगायत प्रतिबन्ध लगाइएका देशमा कोरोना केही नियन्त्रण हुनेबित्तिकै सावधानीमा लापरबाही गर्दै गएकाले दोस्रो लहरका रूपमा संक्रमण पुनः देखिन थालेको डब्लूएचओले चेतावनी दिएको हो। एजेन्सी